الجمعة، 27 أبريل 2012

كيف تجاسر ( تجرأ ) الشيطان على الله باستخدامه لاولاد الله

كيف تجاسر ( تجرأ ) الشيطان على الله باستخدامه لاولاد الله


سؤال غريب مش كدة - لكن تعالو الاول نتعرف مع بعض عن من هو الشيطان - يعنى هل الله خلقه هكذا ( شيطاناً ) ام هو الذى اختار ان يكون شيطانا - ممكن حد يسالنى و يقولى ازاى بقى الشيطان يختار انه يبقى شيطان هذا لو هو شخص مسلم - لان اخوتنا المسلمين عندهم فكر ان الله قد خلق الشيطان و هذا هو سامحونى لانى اقول لكم ان هذا هو(( جهل بطبيعة الله القدوس )) الذى خلق كل شئ حسن ( و راى الله كل ما عمله فاذا هو حسن جدا - تكوين 1 : 31 ) و هذا ما نعترف به فى صلاة الشكر قائلين ( فلنشكر صانع الخيرات الرحوم الله ) - فالله يا اخوتى هو صانع الخيرات لكل الكائنات التى خلقها
- و لكن السؤال المطروح و هو اذا كان الله خلق كل شئ حسن فمن اين جاء الشر ؟!! و للاجابة يجب ان نفهم ان الله خلق لكل كائن حى ارادة و عقل يميز به الصالح من الطالح و الخير من الشر حتى " الملائكة " اعطاهم الله هذه الارادة يعنى اعطاهم العقل و الفكر المميز

و لكن السؤال اذن من اين جاء الشيطان اذا كان الله خلق الملائكة فقط ؟ و للاجابة علينا ان نعرف انه كان يوجد ملاك و هذا الملاك  كان ذات اعلى رتبة ملائكية امتلأ بروح الكبرياء و لذلك من صفات الشيطان انه المتكبر ) و هذا ما عرفناه من سفر حزقيال النبي و هو حدثنا بكل تفصيل ذلك فيقول "هكذا قال السيد الرب: أنت خاتم الكمال وملاّن حكمة وكامل الجمال، كنت في عدن جنة الله. كل حجر كريم ستارتك.. أنت الكروب =( ملاك ) المنبسط المظلل وأقمتك. علي جبل الله المقدس كنت، بين حجارة النار تمشيت. أنت كامل في طرقك من يوم خلقت حتي وجد فيك إثم. بكثرة تجارتك ملأوا جوفك ظلما فأخطأت، فأطرحك من جبل الله وأبيدك أيها الكروب المظلل ( الكروب = ملاك ) من بين حجارة النار. قد ارتفع قلبك لبهجتك ( تكبرت عندما رايت جمال الخلق فيك )، أفسدت حكمتك ( سقطت )لأجل بهائك.." (حز 28: 12- 17).

- ومنذ هذه اللحظة سمي المعاند أو المقاوم لله، لإنه لم يرجع عن سقطته ولم يشعر بخطئه و لم يرجع عن تكبره ولم يطلب التوبة إلي الله إلي وقتنا هذا.
” ذاك كان قتالا للناس من البدء ولم يثبت في الحق لانه ليس فيه حق.متى تكلم بالكذب فانما يتكلم مما له لانه كذاب وابو الكذاب (يوحنا 8: 44)

- و هذا الشيطان الملئ بروح التكبر يرفض ما لله من قداسة
- سامحونى لهذه المقدمة الطويلة التى ستكون مدخل لموضوعى الاساسى و هو عن طلب المسيحيين للطلاق و الزواج
فانا هنا لن اذكر ايات من الكتاب المقدس و لن اتكلم عن اسلوبهم الذى اتبعوه فى التظاهر من اجل تنفيذ ارادتهم ( الخارجة عن ما قاله السيد المسيح )فهؤلاء من اجل شهواتهم يريدون ان يتحايلوا ليصلوا الى اهدافهم ( الشهوانية ) متحالفين مع الشيطان حتى لو كان هذا ضد تعاليم السيد المسيح و الذى كلمنا عن شعبه منذ العهد القديم قائلا ( كونوا قديسين لانى انا قدوس ) فهل شعب الله اصبح ممتلئ بروح الشيطان الذى هو قتالا للناس و يستخدمهم ليكونوا اداة فى يده ليضربوا بتعاليم السيد المسيح بعرض الحائط

- هؤلاء الذين امتلؤا بروح الكبرياء لدرجة انهم اصبحوا يريدون ان يعدولوا على شريعة الله التى اسسها منذ بداية الخليقة برجل واحد هو ابينا ادم و ام واحدة هى امنا حواء , و انا حأسألكم سؤال و هو لماذا لم يخلق الله اكثر من حواء لآدم يعنى كان يستسخ 3 او 4 حوات علشان آدم لما يطهأ من حوا يلاقى واحدة تانية تدغدغ عواطفه و كمان كان يستنسخ 3او 4 نسخ من ادم علشان لما ادم يكشر لحوا تروح سايباله الجنة بتاعته و تروح لجنة ادم رقم 2 - مهية زيطة يا جدعان !!! , انا عايزة افهم هل الله كان غير عادل هل الله لم يكن يعرف حكم الشهوة على الانسان و لكن نرجع و نقول انه هو ((القدوس و انه هو الصانع الخيرات )) التى نتلوها فى صلاة الشكر فهل صانع الخيرات يريد اذلالنا بشريعته - حاشا - فالله عادل و قدوس و صانع خير و ايضا هو صانع الحب و لكنه ليس هو الصانع للشهوة
- و السؤال اذن ما هو الفارق بين الحب و بين الشهوة اذا كان الاثنان متلازمان فى الحياة الزوجية و اذا لم يتواجدا فترت ( بردت ) الحياة الزوجية و اصبح الطلاق هو الحل
- و لكن انا حارد عليكم عن معنى الحب - فالحب يا اخوتى هو العطاء بلا حدود و بذل من اجل اسعاد الطرف المحبوب او الجماعة المحبوبة او الشعب المحبوب 
- اما الشهوة فى عكس الحب فهى مبنية على الأخذ و الاشباع دون النظر لسعادة الطرف الآخر

- فالانسان الذى يبحث عن ارضاء ذاته هو انسان لا ينظر الا الى ذاته و لا يحب الا ذاته و لا يعترف الا بذاته لانه ملئ بروح الكبرياء الذى ورثه عن ابيه ( الشيطان ) و لذلك يستخدمهم الشيطان ليتجاسروا على تعاليم الله القدوس بل و يطالبون بالغائها من اجل تحقيق  و اشباع شهواتهم و نزواتهم التى عند اول مرض تتلاشى و تكون موجودة و عندها يشعرون بانهم كانوا اغبياء لانهم سمحوا للشيطان ان يسخر منهم و يستغل ضعفهم و يكونوا هو اداة لمهانة الله بمهانة كنيسته التى هى ملتزمة بتنفيذ تعاليمه و هى اساس العلاقة الزوجية المسيحة و هذا ما قاله السيد المسيح عن سر الزيجة قائلا ( ما جمعه الله لا يفرقه انسان ).

الأربعاء، 18 أبريل 2012

الألم اللى صرخ منه "عمر عفيفى " لما نزل يرف على افاه من الاخوان المسلمين




الألم اللى صرخ منه "عمر عفيفى " لما نزل يرف على افاه 




لا يلدغ المؤمن من جحر مرتين , بهذه العبارة ابتدأ التعبان " عمر عفيفى كلامه فى اليوتيوب و هو يعتصره غصة الالم قصدى الالم اللى عطاه ليه الاخوان على أفاه - على فكرة ده كلامه على اليوتيوب اللى اتنشر تحت عنوان (عفيفى يكشف انتهازية قيادات الاخوان و موقفه من 20 ابريل ) ففى هذا اليوتيوب كشف عمر عفيفى عن نفسه انه كان شريكا للاخوان و يبدوا انهم قد اتفقوا معه اتفاق سرى لتوليه منصب فى الوزراة بعد ان تؤل الحكومة اليهم و لكن للاسف المنصب اتحول لالم يرف على أفاه و فيما يبدوا يا جدعان انه لسة بيلالى منه و هوة عايز يلاعب الاخوان بالصبيان بتوعه اللى هما شباب الثورة ( شفتم يا شباب الثورة انتم فى الآخر طلعتم مجرد صبيان للمعلم " عمر عفيفى " اللى بيقولكم متنزلوش علشان الاخوان بيلعبوا على حسكم علشان يكسبوا متش الر ئاسة و يسلموه لمحمد مرسى ( الرئيس الاستبن - المهوى ) ده بردوا من كلام عمر عفيفى فى اليوتيوب - و اللى بيتحدى محمد مرسى انه يواجهه و قاله ( يا كذااااااب ) و لكن هوة محتفظ لنفسه بسر الكذب اللى بيكذبه مرسى استبن الاخوان للرئاسة 


- شوفوا يا شباب الثورة ( الشرفاء انا عايزة اتوجه ليكم بكلمة تخاطب عقولكم و هى هل تقبلون على انفسكم ان تكونوا مجرد قطع من الشطرنج يحركها عمر عفيفى من ناحية و الاخوان من الناحية الاخرى - ده سؤالى و حاقولكم انا باسالكم السؤال ده ليه 


- عمر عفيفى بيقول ان الموضوع يلزمه الذكاء يعنى تعرف امتى تنزل و امتى ما تنزلش و تبقى عارف انت ح تحقق ايه و لمين - و بصراحة انا باتفق معاه جدا فى الحتة دى ان الموضوع موضوع ذكاء لكن انت يا عمر يا عفيفى ذكائك قد خانك عندما صرخت من الم الاخوان اللى نزل يرف على افاك و انت قلت مثل هوة بينطبق عليك انت اكتر من الاخوان و هو كما قلت ( طمعنجى بناله بيت فلسنجى سكنله فيه ) فأكبر فلسنجى عرفنا هم الاخوان المسلمين اللى كل شوية يقوللنا كاتش العب من جديد و كلنا عارفين اللعبة بتاعة الجنة و النار بتاعة قول ( نعم ) علشان تدخل الجنة 


و تعالوا نكمل مع كلام هذا الطمعنجى اللى بنى البيت اللى اسمه عمر عفيفى اللى كان السبب فى ما نعيشه الآن و اتفرجوا عليه و هوة بيولول زى الولايا قائلاً


(( مافيش واحد يخونى و امشى معاه تانى و حتى لو حامشى معاه بس يبقى باساس ممكن اسامحه ويعتزر و يعترف  و نحط اسس ^^ و انا حاسالك يا عمر يا عفيفى انت عايز الاخوان يعتزرولك على ايه بالظبط و ايه هو الاساس اللى انت عايز تحطه - انتطر اجابة منك ده لو عندك الشجاعة و لككنى اشك فى شجاعتك ^^ و نكمل مع هذا الطمعنجى عمر عفيفى و نشوف باقى كلامه  




, ^^لكن مش اموت نفسى علشان خاطر سيادته يركب البى ام دبليو و لا الفيلا اللى فى التجمع الخامس ^^ استوب عندك يا عمر يا عفيفى انت قلت تموت نفسك علشان خاطر سيادته يركب عربية بى ام دبليو - هوة انت كنت شغال لحساب الكتاتنى - طيب هوة الكتاتنى كان وعدك بايه و بعدين ده اللى مات خيرة شباب مصر يا ضلالى و انت قاعد قاعد بتولول من حته الم ضربهولك الاخوان على افاك - يعنى لسة فيك الروح و قاعد لسة بتخطط للصبيان بتوعك - قصدى شباب الثورة لمؤخذة - ^^ و نكمل مع هذا الطمعنجى و نشوف بيوجه كلامه لمين 


(( و لا ايه يا استاذ الكتاتتنى و لا بتاخد كام ما تقوللنا فلوسكوا دى)) ^^ عمر عفيفى خرج من مرحلة الولولة من الالم اللى على افاه لمرحلة النأ و الأر على الكتاتنى ^^ و نكمل وصلة الردح اللى بيقولهالهم (( بس أعدتوا تقولوا الشباب و التمويل و ستة ابريل ده انتوا عيب اوى بس عموما ما تستعجلوش التقل جاى ورا وحدة وحدة ))^^ شكله واثق من نفسه و من الصبيان الكمبارس اللعيبة اللى معاه و هوة بيقول التقل جاى ورا و هو بيتكلم عن التكتيك و تكنيك التحركات فى الثورة العفيفية لمؤخذة مش المصرية مهية الفولة بانت و بانت لبتها خلاص 


- اسمعوا يا صبيان عفيفى هوة بيقولكم ايه و اياكم ماتسمعوش كلامه 


((اناشد كل الشباب تشغيل العقل ح ناجل ممكن تلت اربع ايام اسبوع بس نشوفهم يورونا القوة علشان يعرفوا حجمهم )) بيقصد الاخوان يوم 20 ابريل اللى ثورتهم لحد العصر لمؤخذة 


- انا بصراحة استكفيت تريقة و تعالوا يا شباب مصر نتكلم و نفهم احنا بنلعب لصالح الاخوان و لا بنلعب لصالح عمر عفيفى اللى كان بردوا بيلعب لصالح الاخوان 
- لازم تفهموا ان هؤلاء بيخدموا اهدافهم و اطماعهم بمعنى اللعبة سياسية وكان الغرض منها الانتقام و انتوا للاسف كنتم شوية الكومباس اللى اتزقوا فى اللعبة و مات شباب و للاسف دمهم كان رخيص 
-  يا شباب مصر ارجوكم ماتبنوش امال على حاجة اسمها ثورة لسبب انها مكنتش ثورة دى كانت انقلاب عسكرى و الدليل انه عند اول مواجهة للعسكرى ليكم كانت مباشرة من بعد تنحى مبارك و كلنا شفنا موقف و قوة العسكرى فى التصدى ليكم - فاناشدكم يا شباب مصر الواعى ان لاتكونوا مجرد صبيان بيلعب بيهم الاخوان او بيلعب بيهم عمر عفيفى 
- اتركوا الملعب للطامعين و اجلسوا متفرجين الى ان يخرج هؤلاء الاخوان و السلفيين يجرون اذيال الخيبة وورائهم عمر عفيفى كى تتحرر مصر من الطامعين و الكذابين و المتلاعبين و هنا تستطيعون تغيير مصر لانها ستكون اصبحت مصركم و انتم القادمون لاصلاحها و لكن ليس بدمائكم و لكن يا شباب بسواعدكم , لان الاموات لا يبنون وطنا بل الاحياء.


الثلاثاء، 17 أبريل 2012

عندما يُقطع لسان " سليم العوا "




عندما يُقطع لسان " سليم العوا "
فيه اخبار بتنقرى عناوينها و ينتهى الموضوع و فيه اخبار تقراها و تعديها و تلتفت الى غيرها و فيه اخبار تخليك بعد ما تقرأها
ترجع و تقراها تانى و تبتدى تستخرج كلمات من بين السطور هى فى الحقيقة غير مكتوبة و لكنها مخفية عن البعض و اما الباحثين عن الحقيقة فلا يكتفون بما هو مكتوب امامهم و لكنهم يغوصون فيما ورائه ليصلوا الى الفهم الصحيح للخبر 

هذا هو ما حدث معى عندما قرأت هذا الخبر (( الدكتور سليم العوا بأن له يد في تضليل الناس حول جنسية والدة الشيخ حازم صلاح ابو اسماعيل وانه متورط في استبعاده بعد تصريحاته في لقاءه علي قناه " الحياة " بأن احد المسؤلين الكبار في الدولة اكد له انه رأي بعينه ما يثبت أن والدة الشيخ حازم صلاح ابو اسماعيل لها جواز سفر أمريكي دخلت به إلى مصر في سنة 2009 قادمة من ألمانيا.)) 

هذا الخبر بدأ بذكر اسم لامع و هو " الدكتور سليم العوا "
و للحقيقة انا بحثت ووصلت ليوتيوب به هذا الكلام و قد اكده فى برنامج الحقيقة لمقدمه وائل الابراشى
و هذا نص نقلته كتابة منقول عن لسان سليم العوا

الدقيقة 5 و 55 قال سليم العوا لوائل الابراشى انه قال(( على قناة الحياة قلت ان شخص مسؤل ان الوثيقة الخاصة بجواز السفر الخاص بوالدة الاستاذ حازم ابو اسماعيل صورتها موجودة عنده بحكم عمله و اخبرنى بذلك و قال ان الوثيقة موجودة تحت ايده ( قال ان صورة جواز السفر تحت ايدى )و قال رقمه - بس انا محفظتهوش لان الموضوع ميهمنيش فى حاجة !!! لكن كنت معاه فى مناسبة اخرى فى عمل آخر فقال ليا الكلام ده - فانا تاكدت منه و استعلمت و قلت له الكلام ده صحيح و قال ليا ان الوثيقة عنده - فكان سؤال وائل الابراشى ان المؤيدين لحازم ابواسماعيل قالوا ان هذه هى حرب قذرة فكان دفاعه انه اتهم بالتشيع و اتهامه بانتمائه لايران و لحزب الله !!!

و من خلال كلام سليم العوا و قوله انه يعرف شخص مسؤل فهو لم يوضح لنا من هو الشخص المسؤل هذا و لماذا قال ان الوثيقة تحت يده مع انها قد ماتت و انها آخر مرة تدخل مصر كانت سنة 2009 - فهل هذا الشخص اللى هوة معرفة سليم العوا كان بيشم على ضهر ايده و بيستعد للهجوم على والدة ابو اسماعيل قبل ما نعرف اساسا بنية ابو اسماعيل بالترشح للرئاسة فى مواجهة سليم العوا !!!! ( شكله كان بيقرا الطالع ) !!!!
-  و هذا احب ان اقارنه بكلام هذا العوا عن اكذوبة الاسلحة التى قال انها بكنائسنا و هو ايضا لم يذكر مصدر هذا المعلومة !!! و النتيجة كلنا رأيناها من هجوم غاشم على الكنائس و الاديرة - فهل هذا اسلوب سليم العوا فى بث الفتن و المكائد ليصل الى هدفه - فهل عندما قال ان بكنائسنا اسلحة كان لاثارة الفتنة بين ( المسلمين السنة و الاقباط ) و هذا يصب فى مصلحة ايران ( الدولة الشيعية ) بمعنى ادق انه بهذا الاسلوب كان يريد ان يدفعنا نحن الاقباط دفعا للتواطؤ مع الشيعة ضد السنة كى نتحد معهم و نساعدهم فى التوغل فى مصر ( فهل هذا يقودنا الى اعتراف سليم العوا فى برنامج الحقيقة عندما قال ( انه أُتهم بالتشيع و انه فعلا ينتمى الى ايران و بالتالى الى حزب الله )

اعتقد انه قد فضح نفسه بنفسه و هذا لا يحتاج ذكاء و لكنه يحتاج الى تحليل لمواقف هذا الرجل الذى يقول انه اسلامى و لكنه ضد ترشيح اى رئيس )
   من ( الاخوان المسلمين - السُنة ) او السلفيين و لذلك طبقا لما قاله وائل الابراشى يعتبر ان موقفه هذا يوضع تحت مسمى ( الحرب القذرة  ) 

- و اذا كانت الامور وصلت الى هذا الحد بين من هم يدعون انهم اكثر معرفة بالاسلام اكثر من باقى المسلمين المصريين و ان هذه مواقفهم ( المشينة ) سواء من مكائد او دسائس او تشنيع دون انتظار القول النهائى للقضاء !!! فهل هؤلاء ممكن ان يكونوا امناء على حقوق الشعب المصرى - بمعنى ادق هل هؤلاء نستطيع ان نأتمنهم على قيادة صالحة تحقق الاستقرار لمصر و هل هؤلاء سيعملون من اجل الشعب المصرى ام من اجل مصالحهم و تحقيق اطماعهم الشخصية 

فمنهم من يهدد بحرق مصر اذا لم يصل الى الحكم و منهم من يحيك المؤمرات ضد مرشح له شعبية و منهم من يتلاعب على وتر حقوق الاقباط و منهم من يتلاعب على وتر الدين و يتكلم بنوع من الكياسة و يقول انه ليس من الاخوان المسلمين و انه منشق عنهم مع انه له نفس الفكر و لكنه مختلف معهم فى الاسلوب الادارى 

- و الخلاصة من بعد الدراسة لمواقف هؤلاء المرشحين الذين جعلوا الاسلام ( مطية ) للوصول لتحقيق اطماعهم الشخصية هم من حقروا من مفاهيم المفروض انها مفاهيم ايمانية تسموا بالدين الاسلامى( كالحق و الصدق و الامانة ) فعندما يفرغ اشخاص ينتمون الى عقيدة و يتحدثون باسمها و هم من يكذبون باسمها و يحنثون باسمها و يتلاعبون باسمها فهؤلاء هم أول من اساء لرسول الاسلام و لدين الاسلام لانهم كلهم كاذبون متلاعبون و حانثون و ايضا مخادعون 

- و هنا يجب ان يتم الحكم عليهم طبقا للشريعة الاسلامية ( اللى بيتغنوا بها على الشعب الأُمى )بان تقطع السنتهم كما تقطع يد السارق كى يكونوا عبرة لمن يفكر ان يكذب بإسم الاسلام لانهم هم اول من استهزأوا و ايضا حقروا من دين الاسلام 


الاثنين، 9 أبريل 2012

عندما ايد مرشحى الاخوان " عمر سليمان "

عندما ايد مرشحى الاخوان " عمر سليمان "






 سؤال طرحته على اشخاص انتخبوا الاخوان و اعطوهم صوتهم , ففى الفترة الاخيرة حاولت ان اجمع اراء الاشخاص تحديدا الذين يضعون بادج الحرية و العدالة على واجهة سياراتهم . 


فقد جمعتنى الظروف مع مختلف الطبقات من اشخاص كانوا سابقا مؤيدين للاخوان و معهم قلبا و قالبا و كنت ابادرهم بضحكة و اقول لهم : ايه يا اخونا الجمال ده جبتولنا خيرت الشاطر من السجن علشان تحطوه على كرسى الرئاسة طوالى - طب اهلوه نفسيا و بعدين خلوه يبقى رئيس و اكمل ضحكى 


- فكانوا ينظرون لى نظرات تحمل الكثير من المعانى و يصمتون !!! فكنت استمر فى كلامى و اقولهم فين الميت لسان لما كنت باقولكم بلاش الاخوان كنتم بتقوموا عليا و تقولولى (( دول اللى حيجبولنا حقنا )) و لا خلاص آمنتم باننا كنا صح , فنظر لى أحدهم نظرة مكسورة و قال لى انتِ عايزة تقولى ايه , فرديت عليه و قلتله انا بصراحة كلامى كان خلص من قبل ما تنتخبوا الاخوان , فقال لى انتِ كنتِ صح و احنا اتغشينا فيهم و كنا مصدقينهم 


 فقلت ليه و ايه النتيجة , فقال لى بالحرف الواحد (( احنا مش حنكرر غلطتنا تانى )) فقلت له يعنى ايه , فقال لى احنا قررنا اننا لن ننتخب الاخوان و لا حد من ريحتهم بل احنا قررننا انتخاب عمر سليمان , قلت ليه عمر سليمان تحديدا !!!, فضحك ضحة خفيفة و قال لى علشان عمر سليمان هوة اللى حيرجعهم لحجمهم الطبيعى , فقلت له انت شايف حجمهم ازاى , فقال لى دول الوصف اللى يتقال عليهم انهم " قوم المتجبرين " فقلت له يا ساتر متجبرين مرة واحدة , 


فقال لى انتى شايفة اللجنة التاسيسية للدستور فقلت له و مين مشافش المهزلة دى , فرد عليا و قالى , دى كانت القاضية مش لينا و لكن عليهم , فقلت له ما توضح عايز تقول ايه , فقال لى احنا لما عطيناهم اصواتنا كان علشان يناقشوا مشاكلنا كشباب و مشاكل الفقر و مشاكل الصحة  و مشاكل التعليم و مشاكل التكدس فى المدارس و الجامعات و المواصلات و غلاء المعيشة , مش علشان يحطوا لينا دستور و يقولولنا حنقطع ايديكم و رجليكم و و خلونا نعيش فى كوابيس والواحد بقى بيتخيل مصر اللى حتتحول لسلخانة للبشر من بعد ما شفنا مناظر التمثيل بالجثث و تغييب القانون 


- و اكمل كلامه قائلا لى انتِ فاكرة يعنى انك انتِ بس علشان مسيحية متأذية من المناظر دى - ده احنا اتصدمنا من الشريعة و من تغييب القانون و اللى بقوا بيطبقوا الشريعة علينا هم شوية بلطجية ماشيين بسيوف - انتِ فاكرة اننا لما عملنا الثورة علشان يبقى فى الآخر مصر يحكمها اللى بيمشوا بسيوف و كرابيج -هم بالنسبة للقانون المصرى " بلطجية " فرديت عليه و قلت له هى دى الشريعة و هما دول اللى انتخبتوهم و هما قالوا انهم حيطبقوا الشريعة الاسلامية - فقال لى لو الشريعة القائمين على تنفيذها بلطجية فنحن سنرفض الشريعة و سنعود من اول و جديد بتطبيق القانون المتعارف عليه قبل الثورة و كمان احنا ح ننتخب عمر سليمان 


فكان كلامه كالعاصفة و مكنتش مصدقة ان هوة ده اللى فى يوم من الايام هيج عليا الدنيا لما قلت له ((بلاش الاخوان ))