الثلاثاء، 25 يناير 2011

ثورة شباب كان فى يوم عنده آمال

ثورة شباب كان فى يوم عنده امال


ثورة شباب كان بيحلم بيوم
يوم يكون فيه نجح و بقى من شباب الخريجين
لكنه انهزم من اول تجربة طلب للعمل  قالوا اصلك مش واصل و مش من البنى ادمين
انت اصلك ناقص مش واصل زى بقيت الواصلين
طب يعمل ايه اصل ابوه كان راجل شريف
الشباب كان كله طموح و امال و لكنه انهزم قدام موجة الطغيان
شابات كانت بتحلم بالاستقرار لكن صحيوا على كابوس العدم و قلة حيلة الشبان
امهات كانت بتحلم بمستقبل بيت تانى يحتمى فيه الاحفاد مع الاولاد
لكن لقوا احلام الادهم انهارت و انقضت من قبل ما ييجى النهار
ليه يا مبارك كدة خليت حال الولاد انعدم و انتهى قبل ما تبتدى لحظة ولادة فكرة امل ترفع بسمة على شفاة بنت وولد
عاشوا يرسموا خطة امل تجمع قلبين عشقوا الحياة
هما ولادنا دول مش من حقهم بردوا يحيوا زى البنى ادمين 
و لا خلاص البنى ادمين اتحددوا بطبقة اصحاب السلطان و اما الباقى دول ملهمش مكان
يروحوا يدوروا على بلد تانى غير بلدهم جايز يرجعوا تانى يبقوا بنى ادمين
طب قلى يا مبارك هى فين البلد علشان انا ام تعبت من نظرة الم بتصرخ فى عيون اولاد
مات فيها الامل من قبل ما ييجى النهار
حرموا خلاص يحلموا
اصل الاحلام ما بقتش خلاص تيجى من كتر الفكر من العدم اللى حاوط الولاد

ليه يا مبارك كده جبروتك صد عنك انك تسمع صراخ شباب
عايز يعيش مش اكتر من البنى ادمين
حطيت قوانين و قلت هى دى اللى تظبط المحتالين و نسيت ان فى السكة فيه غلابة  مش لاقيين
و حوطنا بجيوش و قلت بس كدة انا كدة ظبطها و بقيت من الخالدين
فى السلطة و قولوا ورايا امين
لكن نسيت يا مبارك ان فيه مكارين
عرفوا ينخروا فى قلوب مليانة بالالم
مات فيها حتى الانين
و هما دول اللى بقى حيكملوا على شباب كان فى يوم من البنى ادمين

كلمة ليك يا مبارك الحق مصر و اتفق مع رجال الاعمال سارعوا بحل ازمة الشباب خفضوا الاسعار - الغوا قانون الطوارئ  - خلونا نعيش
و انت يا احمد يا عز طلعلك مليارين تلاتة و فك بيها ازمة شباب البلد - اعمل مشاريع تستوعب الخريجين
اما انت يا عفيفى فكفاية بقى نفخ فى النار اللى اول ما مسكت مسكت فى شباب مقهور و مغلوب على امره - انت اللى خرجت مارد من شعب غضبان فى الاصل كان غلبان محتار
و انتوا يا شباب كفاية غضب لحسن انتوا بقيتوا لعبة فى ايد الشيطان
قاعد بيدى فى اوامر و بيشرب شاى و لا على باله و اسمعوا تقليب كباية الشاى
الباشا قاعد فى الدفا - و بيدى اوامره ليكم يا شجعان
اول مرة اشوف معركة قائدها مستخبى بدل ما يكون فى مقدمة الشجعان
يا هل ترى ناوى تكون ريسنا القادم و لا رئيس دخليتنا يا فارس بنى .....!!!

ليست هناك تعليقات: